Entre valados e piñeirais. Achegas arqueolóxicas ao coñecemento da presenza militar romana na Galicia nororiental

Abstract

Preséntanse os indicios de sete sitios arqueolóxicos localizados a partir de ferramentas de teledetección na provincia de Lugo. Con diferentes niveis de certeza, proponse a súa interpretación como asentamentos militares de carácter temporal vinculados á presenza do exército romano neste territorio. Ao tempo, a análise da súa morfoloxía e das decisións sobre as localizacións fan estes sitios consistentes con outros campamentos temporais xa estudados previamente no noroeste peninsular. Unha análise espacial dos recintos suxire tamén que respondan a misións ou operativos distintos, e estenden a presenza militar romana ao longo de diferentes vías históricas que penetran no territorio galego desde a provincia de Lugo. O artigo tamén chama a atención sobre o forte proceso de degradación que están a sufrir estas estruturas nos últimos anos, derivada da intensificación da presión antrópica sobre o territorio.